Böle Bonken

Faan Wikipedia
Didiar artiikel "Böle Bonken" as eksklusiif üüb't Nuurdfresk Wikipedia!
Tekst üüb Öömrang


Bandix Friedrich (Böle) Bonken uun't ääler faan amanbi 50.

Bandix Friedrich Bonken, uun't ääler Böle näämd (* 18. Mei 1839 üüb A Grööd, † 10. April 1926 uun Foortuft) wiar en skuulmääster an lewet sin jongensjuaren üüb A Nääs an leederhen üüb Oomram.

Leewent[Bewerke | Kweltekst bewerke]

Üs Bandix trii juar ual wiar, skebet hi mä sin aalern faan A Grööd tu Nuurderhörn üüb A Nääs. Diar auernaam sin aalern en büürsteed, diar bit 1963 sted. Bandix san aatj wiar Broder Bonken, büür an uk skuulmääster för a jongen üüb A Nääs. Hi stoorew 1881.

Efter't freimaagin wiar Bandix halper bi a skuulmääster uun Enge. Faan 1858 bit 1860 wurd hi tu'n skuulmääster ütjbilet uun't seminaar faan Tondern. 1865 ging'er tu Neebel üüb Oomram an wiar diar skuulmääster an köster. 1892, hi wiar man iarst 53 juar ual, wurd'er panjuniaret, auer hi knaap noch luke küd. Hög juaren leeder wiar hi blinj. Di nööm Böle füng Bandix üüb Oomram, det ment so föl üs unkel. Sin leewent loong strääd'er för a krastelk gluuw an at fresk spriak.

Efter sin panjuniarang wiar Böle weder föl üüb A Nääs, ging faan hüs tu hüs an hääl biibelstünjen uf. Hi wost föl biibelsteeden ütj at hood, sodenang küd hi sin stünjen uk üs blinj maan ufhual. Stürwen as'er 1926 uun Foortuft, huar hi üüb besjük wiar.

Bilen[Bewerke | Kweltekst bewerke]

Buken[Bewerke | Kweltekst bewerke]

  • Bandix Friedrich Bonken: Lidjan unt Ömrang-and Halleg-Fresk. Jensen, Breklum 1914
  • Bandix Friedrich Bonken: An Lidjenbuk unt Fresk. Jensen, Breklum 1925

Luke uk diar[Bewerke | Kweltekst bewerke]

Diheer artiikel luanet det leesen.
Didiar artiikel as di 01. Mei 2017 uun det list faan gud artiikler, diar det leesen luane apnimen wurden. Uun uugenblak jaft at diar 73 faan.