Iraan

	جمهوری اسلامی ايران; Dschomhūrī-ye Eslāmī-ye Īrān; Islaamsk Republiik Iraan
Flagge des Iran	Wappen des Iran
Flag	Woopen
	Woolspröök: استقلال آزادی جمهوری اسلامی; Esteqlāl, Āzādī, Dschomhūrī-ye Eslāmī; (persisk för „Suwereniteet, Freihaid, Islaamsk Republiik“)
Amtelk spriak	Persisk
Hoodstääd	Teheraan (Tehran)
Stoot (skak)	Islaamsk republiik
Stoot baas	de jure: Imam Muhammad al-Mahdi; de facto: Ajatollah Seyyed Alī Chāmene'ī
Regiarang baas	President Masoud Pezeshkian
Grate	1.648.195 km²
Iinwenern	92.838.753 (2025)
Iinwenern per km²	44,9 Iinw./km²
BIP Totaal (nominaal); Total (KKP); BIP/Iinw. (nominaal); BIP/Einw. (KKP);	2011 $ 496,243 Milliarden (25.); $ 1.006,540 Milliarden (17.); $ 6.445 (80.); $ 13.072 (70.);
HDI	▬ 0,707 (88.)
Münt	1 Iraans Rial (iar = 100 Dinars)
Natsionaalhümne	Soroud-e Melli-ye Dschomhuri-ye Eslami-e Iran
Tidjsoon	UTC+3,5 / UTC+4,5 (Maarts-September)
Autokääntiaken	IR
TLD	.ir
Tilefoonföörwool	+98

Tekst üüb Öömrang

Tekst üüb Fering

A Iraan (uk Persien, persisk ‏ايران‎ Īrān [iːˈrɔːn] ) as en lun uun Fööraasien. Bit 1979 wiar't en monarchii, sant det rewolutsion as't en islaamsk republiik.

Geografii

Koord

Tehraan

Urmia Sia

Kaspisk Sia

Geograafisk Laag

Iraan leit twesken 40° an 24° (faan a nuurd tu a süüd) an 64° an 44° (faan a waast tu a uast). At lun as amanbi fiiwsis grater üüs Tjiisklun. At lun dialt grensen mä sööwen lunen. Det lingst grens (1.599 km) faan't lun wurt mä Irak an det kurtst (48 km) mä Armeenien diald. At lun dialt uk en 921 km lung grens mä Afghaanistaan, en 689 km lung mä Aserbaidschan, en 909 km lung mä Pakistaan, en 1.148 km lung mä Turkmenistaan, en an en 534 km lung mä’t Türkei. A eeg faan Iran bi det Kaspisk Sia as 728 km lung uun a nuurd an bi a Persisk Golf mä 1.536 km uun a süüd.

De huuchst ponkt uun't lun as mä en hööchde faan 5.600 meetern de Damawand (üüb Persisk كوه دماوند, DMG Kūh-e Damāwand), wat uun dön Alborz Berger leit.

Prowinsen

At lun hää 31 prowinsen:

#	Prowins	Hoodsteed
1	Alborz	Karadsch
2	Ardebiil	Ardebiil
3	Buuschehr	Buuschehr
4	Chuuzestaan	Ahwaaz
5	Esfahaan	Esfahaan
6	Giilaan	Rascht
7	Golestaan	Gorgaan
8	Hamadaan	Hamadaan
9	Hormozgaan	Bandar Abbaas
10	Iilaam	Iilaam
11	Jazd	Jazd
12	Kermaan	Kermaan
13	Kermaanschaah	Kermaanschaah
14	Kohgiiluuje an Buujer Ahmad	Jaasuudsch
15	Kordestaan	Sanandadsch
16	Lorestaan	Chorramaabad
17	Maazandaraan	Saarii
18	Markazii („Maden“)	Araak
19	Nuurd Choraasaan	Bodschnuurd
20	Qazwiin	Qazwiin
21	Qom	Qom
22	Paars	Schiiraaz
23	Razawii-Choraasaan of Chorasaan-e Razawii	Maschhad
24	Zandschaan	Zandschaan
25	Semnaan	Semnaan
26	Siistaan an Beluutschistaan	Zaahedaan
27	Süüd Choraasaan	Biirdschand
28	Tehraan	Tehraan
29	Tschahaar Mahaal an Bachtijaari	Schahr-e Kord
30	Uast-Aserbaidschaan	Tabriiz
31	Waast-Aserbaidschaan	Urmia

Kliima

Iraan hee en manigfualig kliima, faan ariid an semi-ariid tu subtroopisk bi't Kaspisk Sia an uun a nuurdelk holtingen (walt), heer faal a temperatuuren säälten oner a froost an det regiuun blaft fochtig. Uun at Kaspsik Sia Regiuun (Giilaan, Golestaan an Maazandaraan) stiig somertemperatuuren säälten auer 29 °C. A juarlik rinfaal as 680 mm am a uast an muar üs 1.700 mm uun't waasten.

Uun't Zaagros baseng, uun a waast faan Iraan, san liiger temperatuuren an hard wontern, mä froostig dai-temperatuuren an swaar snä. A uast- an madel-baseng san ariid, mä maner üs 200 mm rin an haa wüüstneien. A somertemperatuuren kön 45 °C raage, uun Dascht-e Kawiir (Persisk دشت كوير) sogoor 70 °C. A UN koordinaator för Iraan hee saad, dat "weederwaant det slimst mensklik seekerhaidsprobleem uun Iraan faan nütidj as".

Köppen-Geiger kliima koord faan 1980 bit 2016.
Köppen-Geiger kliima koord faan 2071 bit 2100, bereegnet troch en globaal apwarmin model, diar det apwarmin uun a kementidj föörütj sai.

Etymologii

Uun at fergingenhaid wurd Iraan faan bütjluns lidj "Persien" neemd. Faan a iinwenern wiar at lun "Iraan" beneemd. De amtlik nööm wiar Persien. Uun't juar 1935 neemd Reza Schah Pahlavi det lun am tu Iraan. De nööm Iraan ment "lun faan a Aarier". Hat woort uun det ääler buk faan a Soroastrismus, Avesta, brükt. Uun't 19. an 20. juarhunert wurd de nööm Aarier faan Europeern brükt, am aal a Indogermaans mensken tu beneemen. Det "Aarisk Rasse" wiar en ütjdrük, diar Hitler brükt, am sin "auerwäärdig ras" tu beskriiwen. "Aarier" ment "eedel" uun Iraansk spriiken.

Histoore

Amanbi 500 f.Kr. wiar det areaal, wat nü Iraan as, at sentrum faan't Achameniiden Rik. A greks stäädstooten streed jin a Persisk armeeen, diar faan Darius de Grat an Xerxes uunfeerd wurd. Do naam Alexander de Grat at lun iin, efterdat hi auer a Achameniiden faan Persien siiget hed. Hi regiaret, bit hi stoorew. Do regiaret a greks Seleukiiden, bit jo faan't Arsakiiden Rik slaanj wurd, diar leeder jin't Röömsk Rik streden hää. Efter at Arsakiiden (Parter) Rik kaam at Sasaniiden Rik (224 – 651) tu a meecht. Ööder fulken haa Persien iinnimen, so üs a Arabern (7. juarhunert), a Türken (10. juarhunert) an a Mongoolen (13. juarhunert). Oober Iraan hed an hee altidj en ööder an eegen iraansk kultuur, diar widjer lewet.

Efterdat a muslimsk Arabern a Iraan iinnimen hed, wurd persisk wüfen üs hüshual-slaawen ferkääft, persisk maaner wurd twüngen, tu bauen, tu büürin an hard werk tu maagin.

Efterdat at Sasaniiden Rik uun 651 ferfool, wiar uun't Umajaaden Kalifaat föl Persisk iinflööd, hauptsechelk det administratsjuun an det hoofkultuur. Maning ferwaltern wiar faan Persisk stamhüsger. Persisk bleew det ofitsiel spriik faan't Kalifaat, bit Araabisk uun't leed 7. juarhunert auernimen wurd. Oober Persien wiar do noch ei foldialig faan a Umajaaden kontroliaret; apartig Tabaristaan (Giilaan, Golestaan an Maazandaraan) wiar oner't Dabujiid dünastii ünufhingig bit 760, an Tabaristaan wurd dial faan det Abbasiiden Rik. Diaram hee Maazandaraani (of Maazandaraans) öler Araabisk wurden üüs Persisk an öler Iraansk spriiken. A Araabisk Abbasiid kalif Haaruun hed Persisk konkubiinen.

Widjert at njüügenst an tjinst juarhundert, 819 bit 999, bleud (Nei-) Persisk spriik an kultuur oner at Samaniiden Rik weler ap. At Turko-Persisk Seldschuken Rik fuarmet at 11. juarhunert.

At Safawiiden-Rik (1502-1736) maaget at Schiitisk rochtskuul faan a Islaam tu't stootsreligioon faan Iraan. A letst köningen faan Iraan wiar faan det Pahlavi dynastii, an regiaret faan 1925 bit 1979, üüs efter en rewolutschuun Ayatollah Khomeini en Islaamisk republiik gründet.

Ufluup

Antike:

Mä't Köningrik Anshan wurd Persien uun det 7. juarhunert f.Kr. dial faan det Meedisk Rik
Achameniiden Rik (Ual Persisk: 𐎧𐏁𐏂, Xšāça, lit. 'keiserrik'): 550 f.Kr. bit 330 f.Kr.
Makedoonsk Rik an Seleukiiden Rik: 330 f. Kr. bit 247* f. Kr. (*uun Persien) Alexander de Grat köning faan Makedoonien, efter san duas haa sin militeers (a diadochen) det könangrik apdiald. Seleukos Nikator
Arsakiiden Rik: 247 f.Kr. bit 224
Sasaniiden Rik (Madel Persisk: 𐭠𐭩𐭥𐭠𐭭𐭱𐭲𐭥𐭩 Ērānšahr, lit. 'Iraansk Keiserrik'): 224 bit 651

Uun de tidj faan a Persisk Riken hee ham en bedüüden kultuur briad maaget. Hanel an konst bleud ap. Ual/Madel Persisk an Arameesk wiar amtspriiken faan't rik. Fööraasien an Madelaasien kaam oner persisk iinflööd an diar wurd bit daaling "iraansk spriiken" snaaket.

Demografii

Spriiken

(Nei) Persisk as at iansigst amtspriik uun det lun. Hat wurt uk snaaket uun Afghaanistaan an Tadschikistaan. Persisk hiart tu a twiig faan a iraansk spriiken an sodening tu't indogermaans.

Üs en skrewen spriik wiar Ual Persisk uun köningelk Achameniiden iinskraften auerleewert. De äälst bekäänd tekst uun Ual Persisk skrewen as at Behistuun iinskraft, wat ütj at tidj faan Schah (Köning) Darius de Grat ( 𐎭𐎠𐎼𐎹𐎺𐎢𐏁 Dārayavaʰuš; 522–486 f.Kr.) komt.

Nai ferwaant mä Ual Persisk, oober faan en ööder twiig faan a iraansk spriiken, wiar Avestisk, det sprik faan't ual relegioon faan Iraan, a Soroastrismus.

Madel Persisk kaam uun a Sasaniiden iinskraften (224 bit 651) föör. Uun literaarisk spriik wurd Madel Persisk iarst leeder, uun't 6. of 7. juarhunert, ferwäänd. Faan't 8. juarhunert uun begant hat tu Nei Persisk tu wanlin, mä det madel-periuud-fuarem, wat bluat noch uun a teksten faan Soroastrismus widjer lewet.

De iarst wichtig Persisk dachter wiar Rudaki. Hi wurd uun't 10. juarhunert feriaret, üs at Samaniiden Rik üüb't hööchde faan sin meecht wiar.

Nei Persisk teksten wurd uun't araabisk skraft skrewen, an kaam uun't 9. juarhunert ap.

Nochhuaren uun Fööraasien san diar soföl ünlik spriiken üüb een bonk üs uun Iraan.

Uun det lun tesken Kaspisk Sia an Persisk Golf wurt uk trii grat manertaalspriiken snaaket, det san Aserbaidschaansk amanbi 20%, Kurdisk (Sorani an Süüdkurdisk) amanbi 10% an Maazandaraans mä Gilaki (bial Kaspisk spriiken) amanbi 5%. An do komt uk Araabisk mä 2% faan lidj uun dön süüdelk regiuunen diartu.

Aserbaidschaansk wurt fööraal uun de nuurd-waastelk loonsdial snaaket, uun Ardebiil, Zandschaan, Uast- an Waast-Aserbaidschaan. Amanbi 16 miljuunen minsken faan a Aseri manerhaid lewe miast nai bi a grens tu't naiberlun Aserbaidschaan.

Kurdisk (mä Lorisk) as en spriik, diar uun Kordestaan, Kermaanschaah, Lorestaan an üs Sorani uun't Autonoom Regiuun Kurdistaan faan a Iraak snaaket wurt. Uun a Iraan snaake amanbi 10 miljuunen minsken Kurdisk.

Maazandaraans of Tabari as det spriik faan amanbi 5 miljuunen mensken. Hat wurt fööraal uun det Kaspisk Sia Regiuun (Giilaan, Golestaan an Maazandaraan) spreegen.

Religioon

Amanbi 90% faan at iraansk lidj san Musliimen. Det stootsreligion as Schiitisk Islaam. Hat as sant det Safawiiden Rik uun't 16. juarhunert det stootsreligion. Hat hiart tu a Twaalew-Imaam-twiig faan det Schiitisk rochtskuul. Amanbi 9% faan a iraansk Musliimen hiart tu a Sunnitisk twiig faan a Islaam, miastendials faan at Kurdisk, Turkmeensk of Beluutschisk manerhaid. 9% faan a Iraanern, diar nian Musliimen san, san mäfulgern faan Soroastrismus, Krastendoom an Juudendoom. Diar lewe son 300.000 bit 370.000 Krasten (maning armeensk Iraanern) an 25.000 persisk Juuden uun't lun.

Kultuur

Köögem

Eegen iraansk köögem san fermingd spiisen faan ris mä "chorescht": fleesk, greensaagen an / of nöden. Krüüsen wurd maning brükt, mä früchten üs plumen, granaataapler, kwiten, aprikoosen an sinken. Iraansk krüüsen an gewürtsen san safraan, green kardamom, an drüget limeten, kaneel, kurkuuma an pitersile wurd brükt.

Festdaar

Uun a Iraan wurt sant 1925 amtelk a Dschalaalikalender brükt. Hi racht ham efter at sanjuar an begant tu Nooruuz (wosbegan). Nooruuz (Iraanisk of Persisk Neijuar) wurd üs festdai al tu tidj faan Achameniiden (6. juarhunert f.Kr.) feiert. För Neisdai wurt en apartig boosel üübberigt, a Haaft-sin. "Haaft" bedüüdet sööwen an "sin" as a buksteew "s" uun at persisk/araabisk alfabeet, amdat sööwen dingen för a boosel benatigt wurd:

Sabzeh (سبزه) – wiaten, bere of lins poon
Samanuu(سمنو) – wiaten siadkurner poding
Sendsched (سنجد) – öölewilger
Serkeh (سرکه) – eetj
Siib (uk Seeb) (سیب) – aapel
Siir (سیر) – knooplook
Somaq of Sumak (سماق) – sumak

Schab-e Yalda of Yalda Naacht (uk Dschella Naacht) as en ual fest uun Iraan, Kurdistaan, Usbekistaan, Tadschikistaan, Afghaanistaan, an Turkmenistaan. Hat wurt tu wontersankiar faan a nuurdhualewkuugel feiert. Hat as miast at naacht faan a 21. Deetsember (of 20. uun skregeljuaren) uun a gregoriaans kalender. A Dai faan Schab-e Yalda as at tidj, wan a san sin liichst stant uun a hemel hee an a dai det kurtst periood faan dailaacht hee. Det as a began faan de astronoomisk wonter. Det lingst an jonkest naacht faan't juar as en tidj, wan frinjer an familje tupkem, iidj, drank an dachtingen faan Hafez of täälen faan Schahnaameh lees, bit widj auer madennaacht.

Früchten an nöden wurd eden an granataapler an weedermeloonen san fööraal wichtig. Det ruad klöör faan dön früchten stäänt för a waremk faan't ial an a glem faan't leewent. Shab-e Yalda wurd uun Deetsember 2022 ofitsiel tu en weltarewdial faan UNESCO.

Natuur

Diarten

Iraan hee en rik tiirwelt mä 34 fladermüs slacher, mangusten, gulschakaal, indisk wulew, indisk faskoter, foos, strimelhyäänen, leopard, euraasisk loks, brünbeer an asiaatisk suartbeer. Paartuanet Kloksdiarten san wilswin, muflon, ruadhirsk an gatselen. A asiaatisk gepard (A. j. venaticus) lewet bluat noch uun Iraan. Domestisiaret slacher san sjep, siig, beest, hingst, weederbüfel, eesel an kameel. Iraan hee muar üs 570 slacher faan fögler, so üs fasaan, aarebaarin, iarner an falken.

Wiartskap

Uun't juar 2017 woon Iraan 214.5 miljarden kubikmeetern faan eerdgas. At lun as üüb't traad steed faan lunen, wat eerdgas wan^[4]. Iraan hee uk natüürelk resursen faan eerdööle. Hat as en mäfulger faan OPEC. Eerdööle as ian faan sin wichtagst eksportprodukten. Ris, konsthunwerk, maten (tepich) an safraan san wichtig lokaal produkten. Iraan as een faan a gratst eksportöören an produsenten faan kaawiar an pistazien üüb a welt. Iraan hee fabriken, diar industriel produkten maage. Iraan werket uk uun't fial faan a biomedesiinsk wedenskapen. Rial as at münt, wat uun Iraan brükt wurt.