Nis Albrecht Johannsen

Täkst aw mooringer frasch

Nis Albrecht Johannsen di ålere (* 11.03.1855 önj Klookris; † 07.02.1935 önj Flansborj), wus di hiimstounsdachter foon e Moore.

Lääwent

Tuläid önj en latj tåågehüs önj Klookris di 11.03.1855, wüks hi ap uner luuder frasche manschne. San taatje wus schrüüdjer, ouers hi uuged di samer uk ma la än glou. Di latje Nis muurst ål as junge foon nüügen iir üt tu jördern önj e Koornkuuch. Hü dåt laawen ham deer for da jungens oufspaaled, heet hi üs awäädrie smuk ferteeld önj "Üt min jördertid".

Ma tratain (13) iir wörd Nis ploufjunge bai en böre än fertiind ham 12 doolere önj e hiile samer. Da broocht hi ma tuhüs tu sin mam. Hu samere wus hi nuch bai e böre, ouers ma seekstain (16) fångd hi önj än liird tu schöljmäister. Jarst wus hi en iir önj Troolebel, weer't ham ai bäisti gefeel. Dåt, wat ham deer bin wörd, wus uk mån wat gråmlik: 24 doolere lüünj fort hiilj iir än e koost än et släipen bål heer bål deer bai da ålerne foon da bjarne. As hi dåt iir luklik am häi, köm'r haane tu di düchtie liirer Ernst Kaper önj Lonham (En åte tu di börgermäister foon København, Dr. Kaper.) Bai ham heet hi en bärj liird än köö foon deer awt seminoor gunge. Dan köm hi 2 iir eefter Weester-Snootebel. As hi dan nuch wi en iir eefter Klasbel köm, befraid hi ham ma en frasch foomen, Metha Lützen foon Naibel. Jü san 55 iir luklik befraid wään. 1885 füng hi en fååst stää as schöljmäister än küster önj Deesbel, än heer bliif hi 24 iir, bit hi ham 1904 tu rou seet. Sin leeste iirnge heet hi önj Flansborj ferlaawed, ouers hi heet önj jü tid nuch fliitji for Fraschlönj uuged.

Wärke

Di "üülje" N.A. Johannsen, sü as hi oofting nåmd wörd, wus en ouremätje gouen schöljmäister. San grutste tiinjst for Fraschlönj lait ouers duch önj åål dåt, wat hi üs aw frasch apschraawen heet. Hi schriif teooterstöögne (Dåt beest as freese önjt hüs, Twari hoode), dachte (Am eenmen bai e wäile), tääle än sunge (Di spånker) aw frasch. Hi heet uk baloode aw frasch ouerseet, sü as Pider Lüng, Nis Randers, Hertjes spuing, Di hålimoon än sin boose, Mattenwäärw. Dåt mååst, wat hi schriif, broocht dåt Lunhamer - än awäädrie dåt Naiblinger blees, än dåt wörd hål lääsen.

Hu foon sin långere tääle san: -

Dööwelt koost
Dåt jörr hüss: en täl üt jü tidd von de 30ijrije krigg, ma frask urde verteeld (1926)
Apätj än dilätj
En paaslik spån: En lewensbill, ma frask urde tiknet (1924)
Näibersbjarne
Üt baj e weijle: En stock üt Najtorps ülj tidd (1926)
Jü fomen von e mauringer hij: En täl üt Noordfraschlönjs urülje dege (1928)
Jü räjs eefter Hollönj: ma frasch urde verteeld eefter Fr. Reuter (1930)
Leen-katreen
Gau näjberschapp: En schocht verteeling üt däjk börredünjs (1930)
Rungholts unnergong (1927)
Swååre tide
bräägen harte
Jü grut amroding
Rüm hart: En verteeling üt vergengen tidd (1925)
Sosselswäjerw
Klår kimming: En lewensbill von de beeste mon önj frasche lönje (1928)

Sin biise teooterstöögne: Twari hoode än Di teemoon än da teewüste san oofting apfjard wörden än hääwe gruten önjklång fünen.

N.A. Johannsen schriif önj sin tääle än dachte am dåt iinjfåch än däik laawen foon iirtids. Üüsen hiimstounsdachter störw 07.02.1935 önj Flansborj knååp 80 iir üülj. Aw san greeftstiinj stönje sin äine uurde:

Wat gödj wus, mäi feriirwe,

wat hiinj wus, mäi ferdiirwe.

Sii uk

Nis Albrecht Johannsen d.j.

Linke

Nis Albrecht Johannsen d. J. (1888-1967) und Nis Albrecht Johannsen d. Ä. (1855-1935) (Nordfriisk Instituut)