Autotoch

Faan Wikipedia
Zur Navigation springen Zur Suche springen
Sylt2.png Söl'ring


Di Autotoch köört twesken Naibel en Weesterlön, dit sen ombi 39 Kilomeetern.

Histoorie[Bewerke | Kweltekst bewerke]

Bigent waar me di Transport fan Autos naa Söl al ön di 1930er Jaaren. Tö Bigening maast di Autos aur di Rampen köör, wat fuar Kraitern becht wiar.
Ön di 1960er Jaaren kām di jest Waggons me tau Laagen fuar Autos, en diarfuar maast em uk nii Rampen haa, dat di Autos diar önköör kür.
Ombi 2001 waar nii Autotochgarnituuren koopet, wat litjemer löp üs di ual Waggons. Me di forskelig Reformen en üđer Bööken, wat di Baan sa fuarher, haa jam di Noomen fan di Autotoch uk foranert: Ombi 2000 war dit "DB Autozug", en bet leeter fing di Toch di Noom "Sylt-Shuttle" en üs Leest waar ombi 2014 DB-Autozug weđer streeken en iin ön di DB-Fernverkehr AG integriaret.
Des her sin Sen, aurdat en Fiirlaaptoch, dit es en Toch fan DB-Fernverkehr, altert üs Jest köör mut, en di Regionāltoch mut teef.

En nii Önbeering[Bewerke | Kweltekst bewerke]

Bitö kumt, dat 2014 en nii Firma, RDC fan Ameerikaa, uk me sin Autotoch köör wil. Di DB-Autotoch waar da bang om sin Rochten tö köör (Trasen), en taacht höm üs en Fekenspölster-Slach üt, dat di Autotoch man en Driifwain me langsnem skel, diar bit naa Bräist of Hüsem köört. Da heer hi leengeri Waien, bitaalet muar en fair muar Trasen üs di üđer Autotochfirma. Des Driifwainer uur üs D-Tochen föört en mut altert üs Jest köör.[1] Di Sylt Shuttle Plus, sa jit dit Driifwain-Önbeering, es fuar't Miist lerig en forbrent aur ark Dai sent Detsember fan 2015 ombi 1.200 buit 1.500 Litern Diesel. Krait niin Huan eeđer.

En bet wat aur RDC[Bewerke | Kweltekst bewerke]

Di blö Autotoch kumt fan RDC (Railroad Development Corporation) fan Ameerikaa. Des es bal aural ön Euroopa en Ameerikaa ön Gang en bringt aaftinoch Leewent üp Streeken, hur nönt muar löp. Sa her di Dütsk Baan di Auto-Raisitoch āpdönen, en RDC heer dit aur BTE (Bahn-Touristik-Express) weđer bigent. Di Tochen sen fuar't Miist gur biseet en Autos sa üs di Mensken diarfan aak me di Toch naa Lörrach of Villach ön Uasterrik.

Uk "Flixtrain" kumt fan RDC en BTE. Dit wiar fuarof di HKX, di Hamborig-Köln-Express.

Töbeek tö di Autotoch[Bewerke | Kweltekst bewerke]

RDC skul al ön di Detsembermuun fan 2015 bigen, man slaaget heer dit ek jerer üs ön di Oktoobermuun 2016. Hat jaav noch olerhun Theaater om dit Töleten fan di ombecht Waggons aur dit EBA (Eisenbahn-Bundesamt).
Em her trii of fjuur Loks fan di Typ Mak DE 2700 hüürt, en di Waggons her jen Laag fuar Autos. Di Tourismus-Experten wiar jest en bet nöölig, dat di Weelen fan di Autos aur holten Planken köör maast, man dit es öntwesken noch auriiten.
Likert sen di MaK-Loks en bet töstig, en ja maaki jaar Ofgas uk ek riin. Tö Bigening fan 2018 kām me en Siemens Vectron DE en aur di Maaten moderni Maskiin fuar di RDC-Tochen, ön di Juuli kām jit jen. RDC heer man dach tau Mak DE 2700 koopet, aurdat Firma Vossloh des ek muar haa en forhüüri wil. Nü laap des fuaral, wan jen fan di Vectron tö Inspektsjoon es.
Di Autotochen fan RDC sen ek fastlair, ja ken uk üs kuurt Tochen laap. Dit es mener gurtem, en mesken spaaret dit uk Diesel.

Futnooten[Bewerke | Kweltekst bewerke]

  1. Fan Bräist naa Weesterlön waaret di Faart man likert bal 2 Stünen, aurdat di jaa ön Naibel achter di Autotoch kumt. Normaal sen 45 Minüten me di Regionāltoch.