Fliigerhalen 25/28 (Söl)

Söl'ring

Hali 25 en 28 sen töhop me di Plaats diarfuar en "Ensemble". wat töhopjert.

En Huk fan Hali 25 weeget al en gansi Masi aur ditdiar Bechning.

Hali 25 her aur di jest Jaaren en litjer Toor en üđer Wininger.

Di Nuurđerwuchen fan biiring Halen sen üs gurt Düüren becht, wat em söner Stroom iipenfo ken.

Hali 28 ön Bidreft, 1961.
Di Torn wiar jerer noch muar san Kontroltorn fuar di Fliigers.

Aur di Düüren ging en gleesen Leechtlist langs,
wat nü suurt techtmaaket es.

Hali 25 en 28 sen Fliigerhalen, diar dit Militeer brükt heer fuar eeđer jaar Fliigers en Hüüvskrüüwers tö lukin.

Di Halen uur sent 2005 sa gur üs ek muar nütet.
Ja staan öner Teenkstairensküül, aurdat dit senerlig Bechningen sen.

Töhopfaating fan di Biskriiwing

Dat Amt fuar Teenkstairensjuts heer biskrewen, wat aur di Bechningen senerlig es, en hurom di ek ofrewen uur skel.

Hali me Aurskot fan Beton (Hali 25)

Di Hali uur fan en gurt Giwölbi deekt, wat wan Betonripen maaket es. Des Ripen gung twerk en langs öner di Aurskot hen.
Ön di Achtersir giar di Aurskot rocht wat diiper dial üs ön di Fuarđersir, wat hentö Nuurđen weeget.
Di Ripenkonstruktsjoon giar achtern dial bit hentö di Grünj, en fuar di Forbining staan achtern Betonstölpen. Twesken des Stölpen es ek techtmüüret uuren.

Achtern en bisirs sen Önbechningen fuar litjer Halen en Warekstairen, sa üs uk Baarirümen en Hüsjes. En Nuurđerwuch jeft et ek, di hiili Flechi es en gurt iirsern Toor, wat en iipen sküüv ken. Diarbi klapt dit töhop üs en Ziehharmoonika.
Aur des Toor langs giar en lung Reeg fan Wininger.
Ön di Uastersir staant en Önbechning me jen Laag. Ön di Süđer- en Weestersir heer dat wuchtigi Önbechning tau Laagen, en diarbenen sen forskelig Rümen sa üs Kontoori, Warekstairen, Manskepsrümen tö finj.

Ön di Huken bitö di Nuurđerwuch sen gurt Torner söner Wininger önbecht, en des haa sa tjuk Aurskoten, dat em diar üp uk Kanuunen henstel en diarme sjit kür.

Aur Hali 25 es jit senerk, dat di ek langsen söner Nuurđerwuch wesen es. Di jest Jaaren ging fan biiring Siren ombi 5 Meeters Wuch fan di Huken wech, en aur dat (waarskiints holten) Toor ging uk Müürstiiner langs. Iin ön des Wuchstrip wiar soks Wininger iinbecht, en bisirs dat Toor wiar fjuur Wininger ön ark Sir.

Ön di Torner wiar jerer Düüren en Wininger.

Hali me iirsern Stölpen en Draiers (Hali 28)

Langs aur di Hali gung fjuur wuchtigi Iirsendraiers hen, wat boowen ön di Meren spüt töhoplaap.
Aurdes falt dat Taak fan di Knip tö biiring Siren of.
Twerk tö des Draiers sen mener tjuk Draiers iinbecht, wat di Kraam wat stabiiler maaki.

Dat Toor es fuar't Miist lik becht üs dit fan Hali 25, en sa jeft et diar uk niin Nuurđerwuch.
Üs em deling weet, es Hali 25 ombecht uuren, aurdat et me dat Toor fan Numer 28 sa gur ging.

Aur't Toor langs giar en lung Bjen fan Wininger, hurfan di hiili Hali höör Leecht fo.
Ön di Süđersir sen hok Önbechningen tö biluki, wat jen Laag haa. Des sen üs Warekstairen en litjer Halen ön di Gang wesen.

Ön di Uaster- en Weestersir sen Önbechningen me tau of muar Laagen tö se, en des sen fuar di forskeligst Saaken nemen uuren.

Üs uk bi Hali 25 jeft et tau wuchtigi Torner me tjuk Taaken fan Beton, hur em me Kanuunen fan sjit kür, wan bütlöning Fliigers kemen wiar.

Hurom em di bihual skul

- Aurseeting fan en Meening -
Halen fan des Gurthair sen deling noch ek muar tö bitaali, wat uk me di āpskailig hoog Lönprisen üp Söl töhophingt.
Di Aart fan di Bechningen kumt fan di twuntiger Jaaren, en senerk di Konstruktsjoon fan di Düüren es sa gur, dat di aur bal 50 Jaaren sa gur üs ek foranert uur.
Di Halen sen bit hentö 2005 ön di Gang wesen en paset uuren. Önlaagen üs di Heitsung en hok üđer Kraam skel bluat döörluket uur en da weđer ön di Gang kum.
Dat Ruar Krüts heer di Hali bit hentö di Uurs fan 2011 üs Laager binütet, en ja wel di Plaats ek hol töbeekdö..
Di Büürfööger wel di Hali 28 hol üs Katastroofensjutshali haa. Em kür al ütprobiari, hur gur dit giar, wan em hok hönert Liren ewakuiari skul.
Di Halen lii mal zentraal üp Söl. Wan di Füürweer Hali 25 nem en dat Ruar Krüts Hali 28, da kür em aural rocht gau henkum.

En da es dit jit ek bluat en Fraagi aur't Jil; em kür diarme uk weegi, dat em me san Teenkstair wat Gurs bigen ken.

Di Plaats kür da jit üs Parkplaats fuar't Engelsk Kiino of di Sporthali gung, sa dat em döör dat Biotoop, wat fan dit Lön jit uur skel, hentö dit of des spatsiari kür. Wan uk ek klaar es, weđer dat Kiino staan bleft: Di Sporthali heer di Gimiindi al aurnemen.

Wan di Teenkstairen diar staan blef, da kür ja fan jaar ual Āpgaav, fuar di Rusen üptöpasi, hentö en lik sa wichtige Āpgaav kum:

Üs Bolwerki töögen Spekulanten.

Galerii

Me Help fan di Bechningshof ön Weesterlön uur't möögelk en maaki beeter Skelter.

• 
  Fuarn Hali 28, ön jen Reeg diarme Hali 25. Ön des Skelt es temelk di Hualev fan di Plaats tö se, wat diartö jert.
• 
  Hali 25, me Aurskot fan Beton.
• 
  Hali 25, Beton-Konstruktsjoon. Di Langs-Ripen laap dial ön di Stölpen.
• 
  Hali 25, Aurskot, Wininger en Toor.
• 
  Hali 25 fan Süđuasten.
• 
  Hali 28 fan Nuurđuasten (Fan di Fuarplaats luket).
• 
  Hali 28 fan Süđweesten.

Skeltern fan 2020

Hali 28 waar fan di Gimiindi Söl āpaarbert en uur nü fuar di Katastroofensküül fan dit DRK nütet.
Di gleesen Leechtliist aur di Düüren ön Nuurđen sen wech, en di Klöör fan di Düüren waar uk foranert.

• 
  Aur di Düüren wiar en gleesen Leechtlist, wat nü suurt techtmaaket es.
• 
  Sa es dit ön Nuurđen uk wesen. Di Plastikwiningern sen nii.
• 
  Hali 28 en 25 fan süđern.
• 
  Di Rest fan di Autowerkstair, mesken dit Haitswerk.
• 
  Hali 25 fan süđweesten
• 
  Hali 25, Weestersir
• 
  Hali 25, Wining ön Süđuasterhuk
• 
  Hali 25, Düüren ön Nuurđersir, jit me ual Klöör.
• 
  Hali 25, Düüren ön Nuurđersir, jit me gleesen Leechtlist diaraur langs.

Luki uk jir

• Lönsamt fuar Teenkstairen ön Sleeswig-Holstiin