Lumke Thoole

Faan Wikipedia
Sylt2.png Söl'ring


Lumke Thoole (* ombi 1690, em liift, ön Norden (Uastfriislön)[1] ; † eeđer 1725) wiar en uastfriisk Wüfhaur, wat iin ön Kārmingskluađern üs Tiinstman en Matroosi tö See faart es.

1725 waar jü aur Bigamii en Transvestitismus önklaaget.

Leewent[Bewerke | Kweltekst bewerke]

Hur Lumke tö Wārel kemen es, weet nemen sa rocht. Jü kür fan Norden kemen wiis, tö des Tir en Stat ön di Graafskep Uastfriislön.

Leeterhen es man bikeent, dat jü 20 km fiiđer ön Emden uunet heer, en diar waar jü ön't Jaar 1716 me di Seefaarer Thys Geertz bifriit. Fan Jungen es nönt bikeent. [1] Geertz ging bal eeđer di Brölep bi di Neđerlönsk Uastindienkompanii (neđerlönsk: Vereenigde Oostindische Compagnie, kuurt VOC) üp Skep en leet Lumke me sin Mooter töbeek.[2]

Em liift, dat jü tö Bigening fan di 1720er Jaaren wech fan Emden ging en naa Utrecht flet, hur jü iin ön Kārmingskluađern Snetjer liirt.[3]

Diareeđer es jü noch naa Amsterdam gingen en wiar diar öner di Noom Jan (of Johan) Theunisz üs Tiinstman önstelt waar. Leeterhen waar jü öner di salev Noom Matroosi bi di VOC. Tö des Tir wiar dir forböören, dat Wüfhaurn üp Skep aarbert.
Likert waar jü 1723 ön dit Skep Berbices önhüürt, wat fan Texel naa Batavia siil skul. Üs dit Skep ön di 17. Juli 1723 naa Kapstadt kām, fuan em üt, dat jüven Wüfhaur wiar. Jü waar fan Buurt stjüürt en ön di 30. Juuli ütsmeten, man fiiđer kām diar nönt fan.

Jü fing Forloof en uuni me di Noom Johanna Theunis Switters ön Kapstadt.[4]

Diar waar jü me Abraham Hartog fan Frankfurt/Main bifriit, wat al tachentig Jaaren ual wiar. Hi wiar al leenger ön dit Kap en jert tö di Liren me fuul Jil.[2] Diarfan kām en Faamen, diar di 21. Januwaari 1725 tö Wārel kām en di Noom Maria Magdalena fing.[1]

Bal waar Lumke Thoole man dach fan Emdenböör Liren keent. Des skreev da tö di jest Man, hur jü oler fan skiaren uuren wiar. Hi wiar tö des Tir fuar di VOC ön Thailand.[2]

Thys Geertz heer da noch Biskiir bi't Amt aur di Bigamii maaket aur Lumke dach bal fastnomen waar.
Bi di Prozes waar jü aur Bigamii en Transvestizismus forklaaget, en jü maast 100 Riksdaalern Straaf bitaali. Iinslööten waar jü uk jit fuar en Tir.[1] Dit Rocht waar ön di 23. Juuni 1725 spreeken.

Eeđer di Prozes sen di Spöören forleesen. Em weet ek, weđer jü jit fan Kapstadt wechkām of höör Faamen jit jens se maast.[1]

Literatuur[Bewerke | Kweltekst bewerke]

  • Rudolf Dekker, Lotte van de Pol: Vrouwen in mannenkleren. De geschiedenis van een tegendraadse traditie. Europa 1500-1800. Amsterdam 1989. S. 48, 73, 102, 157.

Luki uk jir[Bewerke | Kweltekst bewerke]

Einzelnachweise[Bewerke | Kweltekst bewerke]

  1. 1,0 1,1 1,2 1,3 1,4 djr: Digitaal Vrouwenlexicon van Nederland. 17. September 2019, ufrepen de 13. Detsember 2021 (neederluns).
  2. 2,0 2,1 2,2 Nigel Worden: Cape Town : the making of a city : an illustrated social history. 1st ed. David Philip, Cape Town 2004, ISBN 0-86486-656-9, S. 55.
  3. H.F. Heese: KRIMINELE SAKE: HOFUITSPRAKE AAN DIE KAAP, 1700 - 1750. Uun: https://journals.co.za. Universiteit van Wes-Kaapland, 2009, ufrepen de 13. Detsember 2021 (Afrikoonsk).
  4. Rudolf M. Dekker: The Tradition of Female Transvestism in Early Modern Europe. London 1989, ISBN 978-1-349-19752-1, S. 77.