Diten

Faan Wikipedia
(Widjerfeerd faan Schaasen)
Waksle tu: Nawigatjuun, Schük
Sylt2.png Söl'ring


Diten (öö. Schaasen) sen fan drügit Küskit maaket. Di diari sen üp di Ailönen bit hentö di fiartiger Jaaren en üp di Haligen bit hentö di sösstiger Jaaren fan't twuntigst Jaarhönert üs Jöling fuar tö haitsi en tö kööki nomen uuren.
Fan di Ailönen es uk bikeent, dat fuar't Jöling Sjipluurter fan di Dik saamlet uuren sen.

Diten maaki[Bewerke | Kweltekst bewerke]

Di Küskit, wat em fuar Diten brükt, waar wunterem iin ön gurt Faten saamelt. Di diar Faten (Mjülkpoten) wiar ombi 75 m³ gurt, en di lair iin ön di Öört, fuar't Miist nuurdfuar di Busem.

Hentö di Uurs uur di Mjülk üt di Faten büten üp di Werev fordiilt. Leeter uur dit ütstampert, wat di Liren me üülen Soken aur di Fet, somtirs uk söner des, maaket haa.
Fan des giar di Wiitighair üt di Mjülk. Diar maast ek olterfuul Stre benen des Brii wiis, üđers kür em di Diten leeterhen ek muar rocht ütsteek.
Wan di miist Wiitighair diar üt wiar, uur dit me en Stamper lik ütstampet, dat et sa 6 cm tjuk blef.

Di Senskiin brükti sa tau bit trii Weeken en drügi dit diari üt. Da nem em en Ditensteeker, wat en bet ütsjocht üs en Glaav, en steek diarfan Kwadraate fan 20 x 20 cm. Des waar da langs di Wuch āprocht en skul jit jens trii Weeken ütdrügi.
Eeđer des waar di Kwadraati omdrait, dat di üđer Sir uk ütdrügi kür, en da wiar di Diten klaar.
Nü kām fan di drüg Diten "Klooten" āpbecht, dat di Winj en di Senskiin di leest Wiitighair ütnem kür. Hentö di Hārefst waar di Diten booven iin ön't Hüs braacht.

Fuar di Wunter brükti ark Hüs ombi 20.000 Diten. Wan di Liren kööki of haitsi wel, kām di diar Kwadraati bluat döör en "Ditenhol" dialsmeten, dat em di bluat jit iin ön di Aurn smit brükti.

Luki uk jir[Bewerke | Kweltekst bewerke]