Brükdom üp Söl
 Söl'ring
|
Senerlig di Friisen en di Ailönsfriisen dö fuul fuar jaar Brükdom, en diartö jert uk jaar ual Spraak.
Drachtenkeren[Bewerke | Kweltekst bewerke]
Ön di Drachtenkeren uur Folklooridaans fan forskeling Lönen daanset. Di Meföligers drai fuar't Miist Drachten fan ual'ing Tiren.
Hat jeft trii forskelig Sölring Drachten.
Jungens-Daansiker[Bewerke | Kweltekst bewerke]
Di Jungens-Daansiker raaket jens ön di Week fuar tö ööwi.
Di Musik uur fan en Hunharmonikaspölster en maningmool fan en Gitarispölster maaket.
Somtirs kumt di Musik uk fan di Maskiin.
Wan di Ker en Āptreer heer, da fo di Jungen jaar Draachten ön. Ja daansi tö'n Bispöl bi't Museeums-Fest fan di Söl'ring Foriining, of bi Brölepen, wan di Wii iin ön't Museeum es.
Ali tau Jaaren daanset di Ker bi „Sylt tanzt“ (Söl daanset). Dit es en Fuarsteling fan muar üs twuntig Keren, wat üp Söl daansi.
Ark trērst Jaar es en Töhöpkumst fan ali friisk Lönen üp Heliglön. Diar faar di Daansikeren altert hen fuar en Weeksjen ön di Maimuun.
Di Drachtenker fur di Jungen waar ombi 1980 fan Maike Ossenbrüggen grünet.
Daansiker fuar Wukseti[Bewerke | Kweltekst bewerke]
Eeđer Heidi Holst, Marts 2012
Di Ker[Bewerke | Kweltekst bewerke]
1975 bigent üs „Folklooridaansers iin ön di Sölring Foriining“[1]
Di Ker drait di Drachten, wat eeđer Kluađern fan 1750 bit 1815 nii maaket sen.
Di Söl'ring Daansiker me di Wuksenen heer 25 Meföligers, hurfan 12 bit 14 Liren medaansi. Hat jeft diar bluat tau Karminger.
Di Ker wel hol muar Daansers en fuaral Karminger haa.
Āpgaaven[Bewerke | Kweltekst bewerke]
Bitö höör Aarber üs Daansiker representiaret di Ker uk Söl' en di Söl'ring Foriining ön di hiili Warel. Diarbi uur di dailk Drachten drain.
Daansen (Videos)[Bewerke | Kweltekst bewerke]
Fuar't Miist sen di Daansen fan Nuurđeuroopa, en des uur töhopstreken fuar dit, wat di Daansers törochtfo ken.
Di Ööwingen sen jens ark Week, en di waari 1 ½ bit tau Stünen.
Videos
Di Kerenföörers haa masi Aarber en liir di Daansen
wat ja di Jungen weegi skel.
Jir ööwi ja fuar di Löns-Drachtendai ön Wedel/Holstiin (6:05 min).
Di Ker fan di Wukseten daanset bi't Ütdön fan di C.P. Hansen-Pris 2013.
Di "Söl'ring Fuardaans" es di iinsigi Daans, diar fan jerer aur blefen es.
Di Musik es waarskiinelk fan Hans Fahrenburg āpnomen uuren.
Raisen/Festi[Bewerke | Kweltekst bewerke]
Di Ker es al hentö forskelig Stairen ön Dütsklön wesen, hur üđer Brükdomsforiiningen en Daansikeren raaket waar.
Di Daansers sen man uk al hentö't europeeisk Bütlön wesen, sa üs Ungarn, Tschjechien, Holön, Denemark en Frankrik.
1990 wiar di Sölring Daansers hentö di USA en Kanada.
Ön't Jaar 2000 wiar ja hentö New York, hur di „German-American Steuben Parade“ wiar.
Kontakti[Bewerke | Kweltekst bewerke]
Hat jeft Bikeentskepen me forskelig Daansikeren, en di Söl'ring Daansers sen aaftinoch Gasten bi Daansi-en Drachtenfesti. Hat jeft uk üp Söl en Drachtenfest, hur di üđer Keren nöörigt uur, hen tö kum.
Dat 25st Jubileeum fan di Ker ön't Jaar 2000 waar töhop me forskelig Foriiningen fan Söl fiiert.
Ön't Jaar 2000 wiar uk dat füfst Söl'ring Drachtenfest, en aur 200 Daansers fan Sleeswig-Holstiin en Denemark kām tö Bisjuk en gratuliari.
Ön't Jaar 2005 kām di 30st Gibuursdai töhop me dat Jubileeum fan di Stat Weesterlön', en da wiar üp di Promenaadi aartig wat luas.
Aur trii Daagen giar dat sokst Söl'ring Drachtenfest ön't Jaar 2006 hen. Hat kām töhop me di 100st Gibuursdai fan di Söl'ring Foriining. Gasten wiar fan't hiili Dütsklön, di Nederlönen en Denemark kemen.
Foriiningsaarber[Bewerke | Kweltekst bewerke]
Bitö di Aarber fuar di Söl'ring Foriining sen di Drachtendaansers uk Meföliger fan di „Landestrachten- und Volkstanzverband Schleswig Holstein“, bi di SHHB (Schleswig-Holsteinischer Heimatbund) sa üs bi di Nuurđfriisk Foriining.
Diarfan kumt, dat ja fan des Foriiningen tö Daansi- en Drachtenseminaari sa üs uk tö Workshops nööriget uur.
Töhopaarber me Grünjskuulen üp Söl (Video)[Bewerke | Kweltekst bewerke]
Ön di Januwaari fan't Jaar 2012 ging di "Skuulmaister" fan di Jungens-Daansiker hentö di Grünjskuulen.
Ön Töhopaarber me di Söl'ring-Skuulmaister fing di Jungen wat aur't Daansin weeget.
Des Skuulmaister maaketi uk forskelig Teksti klaar, wat di Jungen da lees kür.
Help: Video giar ek?
En litj Film aur Daansi-Ööwingen ön di Muasemer Grünjskuul
Söl'ring-Önerrocht fuar Jungen[Bewerke | Kweltekst bewerke]
Iin ön di Jungensgaart[Bewerke | Kweltekst bewerke]
Iin ön di Grünskuul[Bewerke | Kweltekst bewerke]
Sölring Önerrocht es manigfaltig en bert en hiil Reech ön Möögelkhiaren.
Jungen liir ark üp forskelig Art en Wiis en sa es dit beeter ön Projektönerrocht forskelig Saaken tö jen Teema üttödön.
Tö ark Teema jert sa wat tö skriiwen en leesen fuar danen Jungen, wat aur Spraak liir, loogisk Reertial fuar di Matematiker, Āpgaawen tö’n teeknen en klepen fuar Jungen me Forstand fuar rüm, musikaalsk Saaken en wat tö’n beweegen, Āpgaawen fuar enkelten of muaren, tö’n teenken, snaken of spölen.
Tö di forskelig Iarler jeft dit fuarskelig swuar Āpgaawen.
Ön min Önerrocht bigen wü töhop en teenk di Uurter fan’t leestmol of liir Niis.
Achterön aarberi wü manigmol wat töhop.
Man wes jeft dit en Tir hur di Jungen fuar jam aarberi, alining of me hoken.
Ön di jest en taust Klas liir di Jungen dit jit miist aur Spölen en Leedjes.
Wü snaki aur Skelter en Saaken en di Jungen finj lecht Uurter en Skelter üp Aarbersblerer weđer.
Di Jungen maali, bastli, forbinj en forglik.
Leeter, ön di treerst en fjorst Klas kum Setninger, Texte en Dialoogen diartö.
Ooft jeft dit en Aarbersplaan hur di Jungen iindrai, wat ja skafet haa.
Sa sjocht em, hurfuul/ wat jat tö Teema aarbert haa.
Dit leest fan ark Stün es di Faarwel-Leedji.
Hat jeft nü jens ek sa fuul forskelig Materiaal fuar Sölring tö koopen en sa besörigi ik mi dit fan forskelig Staiđer: Leedjis jeft dit al of ik aurseet wat, wat paset. Di Aarbersbleerer maaki ik salev of aurseet hoken.
Dit ken wiis dat ik diartö fan üđer Spraakönerrocht nem of uk üt di „Sachunterricht“.
Tö Bigen kum Āpgaawen weđer en weđer, sa dat di Jungen waker weet, wat tö dön es.
Miist jeft dit tö di Teema Liispölen sa üs Doomiinoo, Triimiinoo (me triihukig Uurterkaarten) of Memoorii.
Wü erfinj diilwiis salev Buurterspölen, man uk Krais- of Markspöln mai di Jungen hol, salev di gurten.
Dit wichtigst fuar di Sölringönerrocht es wat fan di Kultuur fiirertödön en di Jungen jen fremer Spraak me Spaas naier tö bring.
Iin ön di hooger Skuul[Bewerke | Kweltekst bewerke]
Söl'ring-Önerrocht fuar Wukseti[Bewerke | Kweltekst bewerke]
Injemskursi bi di Söl'ring Foriining[Bewerke | Kweltekst bewerke]
Ark Wunter uur Kursi fan di Söl'ring Foriining önbeeren.
Diarfuar heer em diar normaalerwiis tau "Skuulmaisters", wat fuar't Miist iinfach Söl'ringer sen, wat di Spraak keen.
Jen Kurs es diarbi fuar Bigensters en di üđer Jen es fuar Liren, wat al en bet snaki ken.
Hentö di Uurs uur di Kursi ofslööten, en da jeft et en "Ofslütinj", hur di Skuulsters Komeedii üp Sölring spöli.
- ↑ Di Ker waar fan Manfred Holst, Muasem bigent. Hi heer bit hentö 1993 uk di Aarber me di Daansers maaket. Sent 1993 maaket dit sin Wüf, Heidi Holst.
|
Didiar artiikel as di 01. Janewoore 2014 uun det list faan gud artiikler, diar det leesen luane apnimen wurden. Uun uugenblak jaft at diar 73 faan. |