Jürgen Borstelmann

Söl'ring

Jürgen Borstelmann, am 2015

Jürgen Borstelmann (* 1963 üp Söl') es en Pianist, Komponist en Organist fan Söl'.
Me 8 Jaaren bigenti hi, üp dit Klawiir tö spölin. Al me 12 Jaaren spöleti hi uk di Orgel, bal uk bi Hööf en ön Konserti.
1980 bit 1983 fing hi en Liirtir bi di Sērkenmusikdirektor Walter Bechmann (Weesterlön') bitö.
Sent 1981 heer Jürgen Borstelmann en Bruarwenig üs Organist üp Söl'. Ark Jaar spölet hi forskeligi Konserti, fuaral iin ön Sērken üp Söl'.

Borstelmann heer di Musik-Hoogskuul ön Lübeck bisaacht en di Proowen diar absolviaret (Stuudien fan Sērkenmusik en könstlerisk Spölin üp di Orgel bi Profesor Dr. Ernst-Erich Stender).

Borstelmann komponiaret uk. Sin Aarbern uur hol fan di Forlachen nomen, en hok waar uk ütteeknet.
Hi maaket uk Kamermusik, en sa heer hi me forskeligi renomiareti Musikern Āptreren her. Hi es uk üp forskelige Toonāpnaamen, sa üs üp di CD „Farewell To The Island“ en Filmbidrachen tö hiir en tö se. Borstelmann maaket uk keltisk en friisk Musik.

Sin Faađer Hans (* 1934) en sin Ohm Willy Borstelmann (* 1927) haa al üs Organisten üp Söl' aarbert.

Aarber üp en fuar Söl'

Sent 1992 sen maning Stelken, senerlig fuar di Söl'ring Spraak, maaket uuren.Eeđer en Taacht fan Hans Hoeg skreev Borstelmann Wiisen aur Dechtingen fan Mensken sa üs Mungard of Wilhelm Siemens. Forskeligi Daans-Steken en Leedjis waar fuar forskeligi Biseetingen ütaarbert.

Jürgen Borstelmann es Organist ön Hörnem - Raantem. Fuar Konserti heer hi sin ain Ensemble. 2013 wiar dit en Organist, jen me en Oboe en jen Floitenspölster, diar uk soong. Des jeet "Ensemble Amabile", Ker diar em lef haa ken.

Me Hans Hoeg heer hi en hiili Bok me Söl'ring Leedjis ütaarbert.

Borstelmann aarbert uk Fuarlaagen üt: Fuar di C. P. Hansen-Pris 2013 heer hi tau Fantasiien aur tau Musiksteken fan Peter Hansen skrewen, diar di Brüđer fan C. P. Hansen wiar. Di jest Fuarlaag her 16 Takti, dit waaret ombi 30 Sekunden tö spölin. Di Taust her 8 Takti en waaret ombi 20 Sekunden.
Di Ütaarberingen sen 6 (Di Jest) sa üs 4 en hualev Minüten (Di Taust) lung uuren. Jen diarfan wiar aliining fuar Klawiir, jen wiar fuar Klawiir en Soprānsaxofoon skrewen. Di Steken waar bi di Tödiiling fan di Pris tö Albert Panten spölet. Di Spölsters wiar da Jürgen Borstelmann üp Klawiir en Thomas Vester üp dit Soprānsaxofoon.

CD fan Friisk Musik

Dit Skelt üp di CD (Jürgen Borstelmann)

2017 braacht Borstelmann en CD me Söl'ring en friisk Wiisen üt. Hi nemt dit salev 20 poetisk Klawiirsteken, en dit paset noch uk gur sa.
Sa üs em dit fan höm keent, heer hi di Wiisen ütkomponiaret, sa dat diarfan en könstfol en broket Musik uuren es.
Fan dit Daans-Stek eeđer Peter Hansen sen ön des CD aur 7 Minüten uuren. "Üüs Söl'ring Lön'" heer Borstelmann ön tau Steken forskelig biaarbert.

Hoken sa gur Klawiir spöli ken of dit liir mai, di ken uk hol en Nootenbok diarfan bi Jürgen Borstelmann bistel.

Borstelmanns Aarber fuar Söl en Sölring

Dit Leedjibok fan Hans Hoeg en J. Borstelmann (2004).

Jürgen Borstelmann en Thomas Vester (2013)

Sölring Koorbok
25 Koorseetings me ain Sölring Wiisen fuar Sölring Lir, eeđer di Aarbern fan forskeligi Dechtern, me 18 Koorseetings fan Jürgen Borstelmann, 3 Seetings fan Karl Kruse sa üs 4 Seetings fan Wilhelm en Hans Borstelmann (ark jen tau Seetings).

Leedjibok „Sjung din Sölring Wiis“
(Töhop me Hans Hoeg ütdönen)

"Siemens-Lieder"
Trii Leedjis eeđer Dechtings fan Wilhelm Siemens (fuar Sjungster en Klawiir)

„Biikibrenen-Leedji“
(fuar Sjungster en Klawiir)

„Üüs Sölring Lön“
(4-stemigi Koorseetings fuar Koor sa üs uk fuar Koor fan Kārmingern)

„Variationen über ein altes Sylter Tanzstück“
Fuar Klawiir, en 16-taktigi Originaaltheema (Peter Hansen, 1824); bitö skreev Borstelmann 13 Variatsjoonen (2013)

„Fantasie über ein altes Sylter Tanzstück“
Fuar Soprān-Saxophoon en Klawiir, 8-taktigi Originaaltheema āpskrewen fan Peter Hansen 1824

„Variationen über ein friesisches Lied“
Fuar Orgel (solo)

„Sylter Klavieralbum“ (romantisk Klawiirmusik eeđer friisk Wiisen fan Söl)
Nooten tö di CD me di salev Noom, 2017
„Sylter Sonate“, „Sieben Fantasien über friesische Lieder“, „Friesisches Wiegenlied“, „Vier Fantasien über friesische Tänze“, „Variationen über ein friesisches Lied“, „Insel-Ballade“ en jit muaren.

Dreaming Pipes

Di CD "Farewell to the island" fan di "Dreaming Pipes" (Jürgen Borstelmann)

Sent 2005 maaket Borstelman töhop me Christina Glede (Blokfloit, Bodhran) en senerligi Aart fan Musik.
Di CD diartö jit "Farewell to the Island" en es uk wert en hiir eeđer.
Jü ken sa üs uk di üđer CDs en Boker bi Jürgen Borstelmann koopet uur.

Luki uk jir

• Jürgen Borstelman ön't Nat
• Di Sērk-Gimiindi Hörnem-Raantem ön't Nat