Text:Önspraak tö di Biike ön Raantem, 2002
 Söl'ring
|
Önspraak tö di Biike ön Raantem, 2002
Guđ Inj altermaal.
Lef Sölring Lönsliren en lef Frinjer fan üüs dailk Ailön.
En hartelk welkemen tö üüs Biiki.
Ik wel nü man en bet suutji snaki, dat di jen en di üder dit mesken beeter forstuun ken.
Üp Plat wel ik sii: "För di wat Plat snakt: 'Ik snak nu een beten suutje, denn köönt ji uns Sölring villicht beeter verstahn!'"
Wan et uk man en Hunfol Liren sen, wat üüs Spraak forstuun ken, es di Hun jit litjer fuar dānen, wat dit snaki ken.
Dach wan di Liren ek sa lai wair, üüs Spraak tö liir'n, wiar't wes üders.
Man üp di üder Sir sjocht em dach, dat dānen, wat niin Sölring, niin Friisk, snaki,
dach bi sa'n Dai üs deling, wes di Taachten kum, hur ja itüüs sen.
Man dit sii dānen uk hol wan ja önerwai sen, üp Fastlön - jaa - da prötji ja diarme,
dat ja fan Söl kum en sii dat ja Sölring sen, man di ain Spraak fan jaar Ailön dit ken of keen ja ek.
Uur bi sa'n Biiki, jir, ek arkmool weđer en Teeken set, dat wü wan't on üüs Brükdom gair,
likert, töhop stuun, of em nü Sölring ken of ek?
Uurter aur dit, hurom wü jir töhop kum, tö Biiki, heer üüs Büürfööger jaa al sair,
en dit, nem ik ön, weet uk ark en jen, üđers wiar hi dach ek jir.
Ik wel nü tö Jen kum, wan ik uk jit fuul muar sii maat, dach ik finj dit ek gur,
wan Liren diar twesken pjati, sa üs nü, aurdat ja jam sii: ik ken't jaa dach ek forstuun.
Lef Lönsliren, I, wat jit en Uurt Sölring snaki, dö des Uurter dach förter.
En tö dānen wat dit forstuun ken, man ek snaki ken, jaa da liir dit snakin dach.
Da bitenk hat jeft en Spreekuurt wat sair:
'Stereft en Spraak - Stereft dit Fulk!'
En dit wel wü dach ek, of?
Ik wenski juu injung jit rocht fuul Formaak en sii:
Biiki fan Söl, skiin aur üüs Lön, sa üs dü altert heest dön'n!
Fuul Dank!