Johannes Mejer
 Tekst üüb Fering
|
Johannes Mejer (* 1606 uun Hüsem; † 1674) wiar en matemaatiker an kartograaf.
Leewent[Bewerke | Kweltekst bewerke]
Johannes Mejer wiar en dring faan en prääster faan Hüsem, diar de likedening nööm hed. Sin mam, Elisabeth Jüngling, wiar a orgelspeler Johannes Jüngling (1522-1627) faan Bovenau sin foomen. Sin jüst gebuurtsdootem as ei bekäänd, man det as bekäänd, dat hi de 12. Oktuuber 1606 krasnet wurd.
Hi studiaret uun Kopenhuuwen matematiik an astronomii an a grünjlaagen faan't kartografii. Hi kaam 1629 tu Hüsem turag an werket do üüs skuulmääster, bejewenhaidsdachter, kalendermaager an kartograaf. Hertooch Friedrich III. faan Sleeswich-Holstian-Gottorf holep ham, üüb en stuudienrais tu a Neederlunen tu keeren. Hi began do för a hertooch en Atlas faan't Amt Aabenraa tu maagin, diarför fing hi faan de Aabenraa Amtsferwalter Joachim Danckwerth halep, wat hi 1641 klaarmaaget. 1639 teekent hi det Nova Tabula Helgolandiae, wat det äälst brükboor koord faan Haliglun as.
1647 maaget Köning Christian IV. faan Denemark Johannes Mejer köningelk matemaatiker an ded ham a üübdrach, en koord faan a waasteeg faan Sleeswich-Holstian tu maagin. Mejer teeknet tau koorden, Nuurdfresklun uun't juar 1240 an uun't juar 1634.
1652 ded Caspar Danckwerth sin werk Neue Landesbeschreibung der zwei Herzogtümer Schleswig und Holstein ütj. At buk hed 40 lunkoorden an steedkoorden faan Mejer. Dön miast faan Mejer sin koorden wurd faan a breler Mathias Petersen an Nicolaus Petersen konstlerisk turochtmaaget an faan a breler Andreas an Christian Lorenzen uun kööberplaaden steet.
Luke uk diar[Bewerke | Kweltekst bewerke]
Commons: Johannes Mejer – Saamling faan biljen of filmer