Robert Miles Sloman
 Tekst üüb Öömrang
|
Robert Miles Sloman (* 23. Oktuuber 1783 uun Great Yarmouth; † 2. Janewoore 1867 uun Hamborag) wiar en ingelsk-sjiisken reeder.
Robert wiar di dring faan William Sloman an Margret Maria Miles (1749-1828). William wiar 1791 tu Hamborag auersiidelt, an hää diar 1793 en reederei grünjlaanj, diar't daalang noch jaft mä di nööm Rob. M. Sloman & Co. oHG.
Robert auernaam det reederei faan san aatj, an baud det widjer ütj. Sant 1836 foor mä det bark Franklin at iarst liinienskap faan Hamborag tu New York. Sant 1841 foor tau dampskeb tesken Hamborag an Kingston upon Hull faan a Hamborger Dampskap Selskap (HaDaG), huar Sloman bedialagt wiar. Sant 1850 foor at Helena Sloman, di iarst damper faan Hamborag tu New York. Mä detdiar skap san flook ütjwaanrern tu Ameerikoo kimen.
Robert Miles Sloman wiar befreid mä Gundalena (=Jong Göntje) Braren faan Olersem üüb Feer. Gundalena wiar en doochter faan Hinrich Braren (1751-1826), en Greenlun komandöör. Flook efterkemen dreeg di nööm Brarens üs madelnööm.
Üs Robert Miles Sloman 1867 stoorew, auernaam san dring Robert Miles Sloman jr. (1812–1900) at reederei.
Luke uk diar
[Bewerke | Kweltekst bewerke]
Commonskategorii: Robert Miles Sloman – Saamlang faan bilen of filmer